_The Mendele Review_: Yiddish Literature and Language
              (A Companion to _MENDELE_)
______________________________________________________
Contents of Vol. 01.015 [Arn Tseytlin Pre-Centennial Issue, Part Two]
25 July 1997

             ARN TSEYTLIN [Aaron Zeitlin] 1898-1973(1)

                          Part One (Vol. 01.014)

1) Yiddish Matters: From the Editor (Leonard Prager)
2) Biografye: (Yekhezkl Lifshits) [Ezekiel Lifschutz]
3) Arn Tseytlins Eseyen: Yitskhok-Bashevis Zinger [Isaac Bashevis Singer]
4) Arn Tseytlin z"l: Eli Vizel [Eli Wiesel]
5) Arn Tseytlin on Himself: Arn Tseytlin [Aaron Zeitlin]
6) Bamerkungen funem tsuzamenshteler: (Y. Lifshits) [Ezekiel Lifschutz]
**Endnotes

                           Part Two

7) "Dernenterung un noentkayt tsvishn yidish un hebreish:  Paraleln un
batrakhtungen" (Arn Tseytlin) [Aaron Zeitlin]
**Endnotes

7)----------------------------------------------------
Date: Fri., 25 July 1997
From: Leah Krikun <lejim@netvision.net.il)
Subject: "Dernenterung un noentkayt tsvishn yidish un hebreish:
Paraleln un batrakhtungen (Arn Tseytlin) [Aaron Zeitlin]



      "Dernenterung un noentkayt tsvishn yidish un hebreish:
                  Paraleln un batrakhtungen"(10)

                         fun Arn Tseytlin

A sakh falshe geter hobn gemuzt tseklapt vern in dem yidish-lager m'zol
kenen makhn di _antdekung_, az nokh alemen iz men fort shtiklech kroyvim
mit di hebreyer, vos voynen ergets in a foder-azyatish land, hobn epes a
universitet oyf a barg un redn loshn-koydesh in der vokhn.... es
blondzhet nokh ergets arum di frage vegn di anonime masn, vos tuen mer
gornisht, nor shafn a spetsiele (reyn mitologishe!)  _masn-kultur_.
S'iz shoyn ober ariber di tsayt fun di politik-makher, vos hobn
oysgenutst yidish tsu bakemfn hebreish, erets-yisroel, alts, vos hot a
shaykhes mit der dray-toyznt-yerikayt fun a folk.  Un oykh der
tsad-shekaneged, di strategn fun dem militantishn hebreism, vos hobn
gefirt di groyse menakhem-mendelshe milkhome kegn der _zhargonisher_
dinstmoyd -- oykh zey -- mit zeyere lag-boymerdike faylnboygns zenen in
a shtarker sakone tsu hobn farshpilt.

Itst, aponim, meg men shoyn.  Itst iz der anti-yidish kamf punkt azoy
bankrot vi di anti-hebreish-milkhome.  Itst zaynen mir ale di zelbe
oremlayt oyf eyn un der zelber kultur-khasene.  Bay mir hot ir gepoylt,
az m'vet gor shafn oyfn hebreishn universitet yene katedre, vos Kloyzner
hot nisht gevolt -- di katedre far yidish.  Ikh zog nisht, az dos vet
forkumen fun haynt oyf morgn.  S'vet gedoyrn.  Ikh bin ober kimat vi
zikher, az oyb yidish vet ergets-vu gelernt un geforsht vern -- vet es
zayn nisht ergets andersh, vi in Yerusholayim.

In dem yidish-lager hot punkt azoy geplatst der teror fun di
politik-makher, vi in dem lager fun hebreish.  Der oytoritet fun di
partey-layt, vos hobn ongevorfn zeyer ideologye un zi aroyfgevorfn, vi a
min khomet, oyf dem un yenem fun di yidish-shrayber, iz mer bay keynem
keyn oytoritet nisht.  S'iz avek di tsayt, ven ale tog hot men
tsugetrakht epes a nay vertl un arayngepoykt in dem vi in a blekhener
poykh ontsushrekn dem oylem feder-halters.  S'iz avek di tsayt, ven di,
vos hobn gehat dos baderfenish un dem mut zikh antkegn tsushteln, hot
men farhilkht mit di zlidne mode-payklekh.  M'iz shoyn nisht azoy shtark
boydek tsi men trogt di koshere tsitses fun _veltlekhkayt_, tsi men
gloybt beemune shleyme in _masn-kultur_, tsi men iz nisht kholile,
gekhapt in di shvartse pintelekh un tsi men hot in keshene dem pasport
fun an amorets....

Iz keday tsu batonen itst, in a tsayt fun dernenterung, az reyn
sheferish genumen, hobn nay-yidish un nay-hebreish say vi keynmol keyn
milkhome nisht gefirt.  Nisht tsvishn yidish un hebreish zenen
forgekumen kamfn, nor tsivshn profesyonele yidishistn un profesyonale
hebreistn.  Nay-yidish un nay-hebreish hobn zikh nisht gehat vos tsu
shlogn.  Zey vaksn beyde fun eyn shoyresh.

Nisht umzist hobn mir gehat biz do nisht lang a gantsn dor
yidish-hebreish-shrayber, vos hobn dos naye yidish un dos naye hebreish
geboyt mit di zelbe getsayg.  Der rezultat iz geven:  zey hobn
durkhgeyidisht hebreish un durkhgehebreisht yidish.  Azoy arum zaynen
geboyt gevorn tsvey shprakhlekhe stiln, vos zaynen geven un geblibn
farbridert, ven men nemt far a bayshpil nisht di verk fun epigonen, nor
di shafungen fun di fundament-leyger.

Vilt ir forshn dem shutfesdikn vortsl fun nay-yidish un nay-hebreish --
nemt nisht di yidishe mayse-bikhlekh fun Ayzik-Meyer Dik, der Vilner
maskil, un oykh nisht di ershte hebreishe haskole-sforim mit zeyer
oysterlishn brokhvarg fun psukim.  Nemt di khsidishe mayse-bikhlekh, vu
loshn-koydesh hot zikh gemisht mit yidish oder -- nemt Reb Nakhmens
mayses.  Ikh meyn nisht dem yidishn tekst zeyern, nor grad dem
loshn-koydeshdikn.  Di yidishe verter, vos ir gefint dort in mitn dem
hebreishn tekst, zenen geven der onhoyb fun a nayem kinstlerishn drang
tsu gefinen in der uralter farheylikter shprakh naye meglekhkaytn fun
oysdruk -- loytn model fun yidish.

                                  B

In dem zin vet nisht zayn keyn paradoks tsu zogn, az Mendele, lemoshl,
hot nor mamshekh geven dem protses, vos Reb Nakhmen hot ongehoybn un vos
hot gefunen zayn oysdruk, rikhtiker:  zayn drang tsum oysdruk, in azoyne
kombinirungen, vi:  "Haka al halekhi shekoyrin patsh."  Haynt klingt dos
vi a kuryoz.  In der emesen ober hot hinter dem gelebt a nayer
shprakhlekher viln, in dem fal:  Der kinstlerisher viln oystsuzukhn oyf
hebreish an ekvivalent tsum kurtsn, hilkhikn, yidishn _patsh_... der --
in flug kuryozer - - oystaytsh:  "shekoyrin patsh," hot zikh genumen
derfun take.

Der shafer fun dem modernem hebreish, -- tsi dos iz geven a Mendele
Moykher-Sforim oder a Byalik, tsi gor a Yude Shteynberg, -- er hot, amol
bavustzinik, amol umbavustzinik, gezukht dem hebreishn ekvivalent far
yidishe verter.  Er hot im oft gezukht un nisht eynmol gefunen un haynt
zenen di ale gefinsn gevorn aza zelbst farshtandlekhkayt, aza organisher
teyl fun dem modernem hebreish, az m'bamerkt afile nisht zeyer opshtam
fun yidish.

Dos zelbe, vos mit dem shafer fun nay-hebreish, iz forgekumen mit dem
shafer fun nay-yidish.  Er hot nisht eynmol gezukht, gemuzt zukhn, dem
yidishn ekvivalent fun dem oder yenem hebreishn oysdruk.  Hot er oder
gefunen, oder tsitirt, dos heyst:  ibergelozt dos hebreishe vi es geyt
un shteyt, arayngeflokhtn es gantserheyt in dem geveb fun der shprakh,
enlekh dertsu, vi s'hot geton, limoshl, Brener, ven er hot in zaynem a
hebreishn tekst arayngetrogn gantserheyt dos nisht-iberzetsbare yidishe
vort:  _farfaln_.

In vos, a shteyger, iz bashtanen di gantse arbet fun Mendele Moykher-
Sforim, dem vikhtikstn bashafer say fun dem nay-hebreishn, say fun dem
nay-yidishn literarishn nusekh?

Ot in vos:  Er hot ongehoybn shraybn yidish oyf hebreish un hebreish oyf
yidish.  Volt er nisht geven der shprakhkinstler, vos er iz geven, volt
zikh bakumen mi-yedeye-vos.  Iz im ober di arbet gerotn un der _nusekh_
-- vi Byalik hot es ongerufn -- iz geshafn gevorn.

Shoyn der nomen aleyn -- Mendele Moykher-Sforim -- iz bashtanen fun
tsvey teyln vos zaynen gevorn eyns:  A yidish-shebeyidisher -- Mendele,
un a yidish-loshn-koydisher -- Moykher-Sforim.  Un geton hot Mendele a
toplte arbet, vos iz oykh geven eyns.  Gezukht in der mishne-shprakh dem
ekvivalent far a hebreishn _yidish_ -- un hot yidish gufe
oysgehebreisht.

Hot men gedarft -- hot zikh Mendele nisht opgeshtelt fun banutzn azelkhe
verter, vi:  bulbusim, vos dos iz geven nisht epes andersh, vi di
hebreizirte form fun di hulye-kaptsndike, ekht-yidishe _bulbes_.

Dos yidishe loshn, vider, hot Mendele gemakht hebreishdik-ernst un
fayerlekh-gehoybn, geshafn far im naye ritmen, aribergeflontste fun der
hebreisher shprakh-teritorye.

Nokh a bayshpil fun _hebreish oyf yidish_ is Perets, tsitirn iz iberik
-- nem un leyen!

S'darf nor gezogt vern, ven m'ret fun Peretsn in dem dozikn
tsuzamenhang, az zayn gantser gang in shprakh is geboyt oyf dem
rabonish-geoynishn farkirtsungs-stil -- oyf dem "veday lechakimo
birmizo" [Aramaic:  'a hint is enough for a wise man'].

Perets -- dos is der MHRSH"A [Moreynu Horav Rabi Shemuel Eidels] oder
der MHR"M-Shif [Maharam= Moreynu Horav Rabi Meir Shiff] , vos iz a
kinstler gevorn un hot genumen shraybn oyf yidish.

Geven tsaytn, kapriz-tsaytn in Peretses shafn, ven er hot zikh
untergenumen tsu boyen a min salon-yidish un hot zikh tsulib dem
arayngelozt in daytsh.  Azoy in same onhoyb fun zayn shafn, azoy gor
arop-tsu, oyf der elter, frier hot er gevolt farsaloneven yidish tsulib
a madam, vos men hot zi gerufn:  Poylish-yidishe asimilatsye, un vos hot
tsugenumen baym yidishn kinstler -- di lezerin, di yidishe froy....  Hot
er, der groys-mayster fun yidish, in onhoyb geshribn "oyfzettse" un
aroyfgezungen serenadish-Haynedik:  "Tsu dayn balkon flien mayne
oygn"....  Dernokh, oyf der elter, hot shoyn a konkrete dame, -- "di
_dama baym meer," vos figurirt in zayne briv, -- farnumen di fantasye
fun dem alt-verndikn poet, un, mit a geheym-faykhtn blik in ir zayt, hot
der zeer fun _Banakht oyfn altn mark_, der vunderlekher dertseyler fun
Reb Shloymes mayselekh un fun de _Folkstimlekhe geshikhtn_, a kereve
geton tsu a min neo-daytshmerizm -- vider a-la salon, salon-yidish!  A
kholem geven -- Peretses a kholem....

Ober geblibn iz Peretses yidisher yidish -- Peretses MHRSH"A yidish --
Peretses yidisher loshn-koydesh.

Un Byalik?  M'shatst unter di badaytung fun zayne yidishe lider far der
stil-antviklung fun yidish un zayne ershte yidishe shirim, -- ver fun di
andere liriker hot zikh gekont farmestn mit zey in dem prat fun ritm un
stil?  "Es hot mikh farplontert mit grins un mit shtraln" iz geven
gedrukt in di ershte yorn fun hayntikn yorhundert un hot gehat dem nokh
nisht-gevezenem, ayzernem koyekh fun dem hebreish-byalikshen ritm -- oyf
yidish.  Vegn poemes, vi "Dos letste vort" -- shoyn opgeret.  Dos iz
befeyresh geven hebreish oyf yidish -- makhtfuler hebreish oyf
prakhtfuln yidish.  S'iz geven sintez.

Vayter:  Mikhe-Yoysef Berditshevskis yidishe kasovim zaynen a shtik
loshn-koydesh oyf mame-loshn un zaynen tsuglaykh a khoshever teyl fun
nay-yidisher literatur.

Geyen mir tsu di andere oves fun der nayer literatur bay yidn -- trefn
mir on, in der proze, oyf dem shoyn dermontn Yoysef-Khayim Brener.  Er
hot oft geshribn yidish oyf hebreish -- un ver, khuts a tempn purist,
vet es im far umgut nemen?  Es is grod nisht geven keyn farlateter
hebreish bay im.  Ful mit stilistishe lates kumt aroys dos bisl hebreish
dafke bay dem oder yenem mishteyns gezogtn purist.  Breners hebreish hot
tif gevortslt in besmedresh.  Tsuglaykh hot er getsoygn zayn yenike fun
yidish -- un keyn shum vidershprukh iz do nisht geven.  Shoyn derfar
aleyn nisht, vayl oykh yidish gufe iz nisht geboyrn gevorn dafke in
yatke-gesl, vi es meynen, a khuts soynim fun yidish, oykh yene radikale
yidishistn, vos redn zikh ayn, az yidish iz geven fun geboyrn on dos,
vos zey farshteyen untern vort veltlekh.  Neyn, Matisyohu Mizish, eyner
fun di bakanste un amoftstn tsitirte yidish-forsher, hot shoyn lang
ongevizn, oyf der shul-opshtamung fun der yidisher shprakh:  oyf ir
religiez-liturgishn yikhes.

A tsveyter klasisher bayshpil fun yidish oyf hebreish -- khotsh oyf gor
an ander shteyger vi bay Brenern -- is Berkovitshes bavuste iberzetsung
fun Sholem-Aleykhemen.  Do hobn yidish un mishne-hebreish zikh derlangt
di hant un zikh azoy tif arayngekukt eyner in anderns ponim, az es hoybt
zikh on tsu dakhtn; dos vos mir rufn yidish, iz nisht epes andersh vi a
hemshekh fun der mishne-shprakh, un dos vos mir rufn mishne-shprakh, iz
geven nisht epes andersh, vi yidish loshn in arameyishn nusekh.

Un Sh.  Agnons hebreish?  Vortslt er nisht in dem yidish-hebreish, oder
hebreish-yidish, fun di khsidishe sforimlekh, fun de tsadikishe
"sipurey-maasiyoys"?

Un oykh tsu im hobn puristn gehat taynes.  Halemay er "misht."  Zey hobn
fargesn, oder keynmol nisht gevust, az aldos kinstlerish un natsional
vertfule say in der nay-hebreisher, say in der nay-yidisher literatur iz
aroysgekumen grod fun ot der _mishung_.

Hot den Byalik zikh nisht farnumen mit "mishn" dem gayst fun beyde
shprakhn, beys er hot geshafn zayne "shirey-am"?  Un hot es geshtert di
"shirey-am" zayne tsu zayn kinstlerish reyn un oysgehaltn?

Aponim, di mishung, vos fun ir ret zikh do, iz in der emesen gor keyn
mishung nisht.  Es ret zikh nor azoy.  Es iz, mashmoes, nisht mer vi a
tsurikgefinen fun eyn un der zelber zakh.  Vos hot zikh ongeton in
Tsveyerley levushim oder, zogn mir, an antplekn fun eyn in dem zelbn
ponim -- dem yidish-natsionaln -- vos hot, vi itlekh ponim, nisht eyn
zayt, nor tzvey.


                           Gimel

Der protses fun kegnzaytikn nemen tsvishn dem nayem hebreish un dem
nayem yidish hot di letste yorn oysgezen vi opgeshtelt eynmol far
alemol.  Farshidene sibes hobn gefirt dertsu:  M'hot zikh fun beyde
tsdodim gevorfn dem get in ponim arayn.  Soynim fun sholem-bayis,
partey-politishe kokhlefl un redl-dreyer, hobn ongemakht a beyz lebn.
Dos porfolk hot zikh tsekrigt un afile Byalik, eyner fun di ershte
mekhutonim, hot gefunen far neytik arayntsuzogn dem tsad yidish "azoy un
azoy."  Geret vegn 18 "yidishn" un oyfgevizn, az oyb yidish vet zikh
vayter groysn -- vet men makhn oys shidekh, vayl, farshteyt ir mikh, der
yikhes iz keyn yikhes nisht.  Un dos shenste derfun iz geven, vos akhuts
mit zayne eygene shirim oyf yidish, vos zenen shoyn far zikh aleyn geven
a shtik yikhes, hot Byalik afile mit di hebreishe shirim zayne
bashtetikt dem natsionaln yikhes fun -- yidish.

Vi azoy?

Ot iz a bayshpil:  ven Byalik hot, lemoshl, in eynem fun zayne bakantste
shirim ("Veim yishal hamalach") farglikhn an eyntsik khmarele tsu dem
himls a "bas-yekhide" -- iz es geven hebreish, ober oyf yidish, vorem a
bas-yekhide iz, loyt dem tsuzamenshtel fun di verter, take hebreish, iz
ober yidish loyt der gefilform, loyt dem emotsioneln inhalt nokh.

Un ven moderne hebreishe liriker in Erets-Yisroel shraybn:  Abale, Imale
-- iz es avade un avade yidish:  Tatele, mamele, yeder eyner vet aykh
zogn, az di dozike form fun diminutiv iz genumen direkt fun yidish -- un
vider dos eygene:  M'darf zen a narisher mumifitsirter purist nisht
ayntsuzen, vi noytik es iz geven aza sort faryidishung.  Hebreish hot
nisht keyn farklenerungs-form -- ober nay-hebreish, vos iz emotsionel
punkt aza noenter korev mit nay-yidish, vi goles-yidn un
Erets-Yisroel-yidn zenen brider fun de zelbe tate-mame, nay-hebreish hot
zikh shoyn on der lirisher intimer farklenerungs-form nisht gekent
bageyn.  Hot men genumen dem _tatele_ un s'iz gevorn:  _abale_, di
_mamele_ -- un s'iz gevorn _imale_.

Di yidishe endung iz genumen gevorn vi zi geyt un shteyt.  Punkt azoy
hot Brener, vi gezogt, arayngeshtelt in zayn hebreish dem yidishn
_farfaln_, vorem -- farfaln:  Er hot fort gemuzt hobn dem _farfaln_, un
azoy vi keyn shum loshn, afile nisht dos vunder-raykhe hebreish, farmogt
nisht keyn iberzetsung derfar, hot er _farshvakht_ di reynkayt un hot on
shum khokhmes arayngekrekhtst dem _farfaln_ in zayn hebreisher proze
arayn.

Un farvos zol a modern hebreish nisht nemen fun yidish in faln ven men
darf un men muz?  Es iz in heskem mit der bester traditsie.  Un punkt
azoy iz in heskem mit der bester traditsie, ven yidish nemt fun
hebreish.  Vayl mir zenen eyn folk -- di yidish-yidn azoy gut vi di
hebreish-yidn -- un mir shepn mimeyle fun eyn kval.  Mir hobn eyn kultur
-- oder mir hobn iberhoypt keyn kultur nisht.  Es ekzistirn dokh nisht
keyn oyser-natsionale kulturn.  Punkt vi es kenen nor teoretish
ekzistirn _kosmopolitn_.  Dos vertl _masn-kultur_, vos hot gedarft shafn
di iluzye fun a kultur, vos iz alts vos men vil, nor nisht natsional.
-- Ot dos vertl hot take gehat a ponim fun khoyzek un a tam fun
khaloshes.

                             Daled

Geret vegn di shutfesdikaytn -- darf men zogn a vort oykh vegn di
untersheydn.

Yidish iz fun onhoyb on geven umbiblish, azoy-tsu-zogn,
besmedreshdik-golesdik.  Take ot di umbiblishkayt fun yidish hot es
gefirt Mendelen, beys zayn zukhn dem yidish-ekvivalent oyf hebreish,
zikh optsuzogn fun dem psevdo-biblishn psukim-hebreish fun der haskole
un tsu banayen di mishne-shprakh.

Dos naye hebreish iz ober keynmol nisht avek fun di biblishe kvaln,
afile nokh dem vi es zenen tsurik antdekt gevorn di shpeterdike -- di
azoy tsu zogn, golesdike -- geyologishe shikhtn fun der shprakh.

Yidish, vider, iz geblibn umbiblish -- oykh nokh dem vi es zenen gemakht
gevorn pruvn tsu shafn bibl-stil oyf yidish.

Tsi iz es ober a gezets, a muz-zakh, a _khok veloy yaavor_?  Ikh meyn:
Tsi muz take yidish blaybn umbiblish un zikh azoy arum -- oyf ot dem
opshnit -- inerlekh opgrenetsn fun hebreish, nisht gekukt oyf ale intime
kultur-shaykhesn tsvishn di beyde shprakhn ?

A groysn shtup faroys hot dos biblishe oyf yidish gekrogn di letste yorn
durkh Yehoyeshes iberzetsung fun dem Tanakh.  Un ot ligt far mir a naye
bukh fun Dovid Ignatov -- di biblishe drame _Far a nayer velt_.

Iz es shoyn kreyativer, fun zikh aleyn kumendiker Tanakh-yidish.  A
nayer nuans, heyst es, fun yidish-hebreisher shaykhes.  A
nay-tsugekumene shatirung.

Ignatovs teme iz de geshikhte mit Yiftekhs tokhter.  Iz do, farshteyt
zikh, zeyr laykht geven arayntsufaln in dem bakantn biblishn, oder
kemoy-biblishn, shavlon.  Iz ober Ignatov in zayn nayem verk azoy
beemesdik-biblish, az afile di nay-hebreishe literatur aleyn, -- mit ire
vunderlekhe biblishe hemshekh-pruvn, vos a teyl fun zey, vi, lemoshl,
Tshernikhovskis "Shir Hashirim Asher LeShaul," zenen
glants-dergreykhungen.  -- Afile zi, zog ikh, meg mekane zayn dem nayem
yidish aza fartifn zikh in tanakhishkayt.  Voltn azelkhe verk vi
Ignatovs iberhoypt meglekh geven, ven yidish un hebreish voltn nisht
geven kinder fun eyn mamen -- kinder fun eyn un der zelber natsionaler
kultur?

Ikh gey do nisht retsenzirn Ignatovs bukh mayse kritiker.  Ikh loz zikh
deriber nisht arayn in analizirn, khotsh, dem emes gezogt, di ideye
funem bukh -- kamf fun dem eybik-getlekhn un eybik-mentshlekhn in undz
kegn dem getsndinerishn un khayishn -- iz azoy noent tsu mir un tsu undz
alemen, az es volt zikh geloynt tsu redn vegn di ale zakhn breyter,
bifrat, az zey bakumen bay Ignatovn aza origineln oysdruk.

Ikh red do fun Ignatovs nayem bukh, vayl in azelkhe verk iz koydem-kol
faran a ginstiker kinstlerisher oysveg far der umbiblishkayt fun yidish
-- a nay vinkl in di intime shaykhesn tsvishn der hebreisher un yidisher
hemisfere fun undzer natsionaler kultur.

                              Hey

Ikh vil rezumirn:

Loyt dem shprakhlekhn material nokh zenen hebreish un yidish tsvey
farsheydene leshoynes, khotsh yidish farmogt fun onhoyb aza shtarkn
hebreishn element un afile azelkhe hebreizmen, vos zenen nokh in
hebreish gufe nisht benimtse un vos a teyl fun zey iz ersht shpeter,
durkh di nay-hebreishe prozayiker, arayngenumen gevorn in der shprakh --
fun yidish aroys.

Ober der gayst, vos farbint yidish un hebreish, iz a sakh shtarker vi
der gayst vos tsesheyt zey.  Zey zenen kroyvim shoyn derfar aleyn, vayl
zey hobn gehat di letste doyres beshutfesdike tates -- azelkhe
yidish-hebreishe un hebreish-yidishe shefer, vi Mendele Moykher-Sforim,
Yitskhok-Leybush Perets, Khayim-Nakhmen Byalik un nokh andere, groyse un
klenere tsvey-shprakhike vort-kinstler.

Dos naye yidish un dos naye hebreish hobn genumen eyns baym andern a
sakh mer vi men shtelt zikh for.  Dos is forgekumen, der iker, in di
yorn fun kristalizirung.  Oyb di letste yorn hot zikh der protses fun
kegnzaytiker hashpoe azoy vi opgeshtelt -- iz dos nisht geven keyn
rezultat fun a natirlekher fremdkayt, nor gikher fun a kinstlekher, oft
beyzviliker, tseshterung fun dem natirlekhn sholem-bayis.

Zenen ober baym hayntikn tog nishto keyn meniyes, az der sholem-bayis
tsvishn yidish un hebreish zol vern banayt un farshtarkt.  Vegn, vi azoy
dem sholem-bayis tsu bafestikn, zenen faran -- zol nokh klekn oyf lang
der guter viln.  A flaysike arbet fun kegnzaytikn iberzetsn un bakenen
zikh darf geton vern frier far alts, oyb men vil, az di itstike shtimung
fun un far dernenterung zol farvandlt vern in, azoy tsu zogn, kinetisher
kultur-energye.

S'vet di izolatsionistn gornisht helfn:  zey veln nisht bavayzn
optsuteyln di beyde shprakh-hemisfern, vos fun zey iz tsunoyfgeshtelt
undzer yidishe velt.  (1940) Endnotes (continued)

9) Tseytlin, 1980, pp. 194-203.

****Romanization by Leah Krikun<lejim@netvision.net.ac.il>
______________________________________________________
End of _The Mendele Review_ 01.015

Leonard Prager, editor

Send articles to:
    lprager@research.haifa.ac.il


Send change-of-status messages to:
    listproc@lists.yale.edu

        a. For a temporary stop: set mendele mail postpone
        b. To resume delivery: set mendele mail ack
        c. To subscribe: sub mendele first_name last_name
        d. To unsubscribe kholile: unsub mendele


              ****Getting back issues****

_The Mendele Review_ archives can be reached at:

http://sunsite.unc.edu/yiddish/TMR