_The Mendele Review_: Yiddish Literature and Language
              (A Companion to _MENDELE_)
______________________________________________________
Contents of Vol. 02.023
1 August 1998

                       ___________________________
                      |                           |
                      |      Eliyohu Lipiner      |
                      |                           |
                      |        (1910-1998)        |
                      |___________________________|


                            der alef-beys (II)

1) "der alef-beys in folklor" (Eliyohu lipiner)

1)-----------------------------------------------------------
Date: 1 August 1998
From: Leah Krikun <lejim@netvision.net.il>
Subject: der alef-beys in folklor (Eliyohu lipiner) [endnotes will be
found in _The Mendele Review_, vol. 2, no. 024]


                    der alef-beys in folklor

                      fun Eliyohu lipiner

[kapitl zibn-un-draysik, _idielogye fun yidishn alef-beys_.
buenos-ayres:  yidisher visnshaftlekher institut -- yivo, 1967.

1.  barir-shetekh tsvishn lomdes un folklor

nisht nor bay di lomdem un mekubolem iz der alef-beys geven shtark
balibt. oykh der poshet|er mentsh fun folk, der anonimer mekhaber oyf
ale folklor-gebitn, hot dershpirt b|khush az in di oysyes gufe, opgeret
fun zeyer hoypt-eygnshaft zikh tsu bindn in verter, iz faran a gantse
velt mit kombinatorishe meglekhkaytn -- un er hot arayngenumen dem
alef-beys in zayne shafungen. a groyse tsol mayselekh, gleybungen,
folkslider, vertlekh un kheyder-shpiln zenen geboyt oyf di oysyes un oyf
zeyer traditsyonel oyfgehitenem seyder oder tsolvert, zogndik eydes far
der geshikhte vegn der madreyge fun gaystik-toyre|sher antviklung
tsvishn di proste mentshn fun folk.

kharakteristish, in dem prat, zenen di farshidene versyes fun a bakant
khsidish maysele, al-pi velkhn afile di ameratsem zenen mesugl, in zeyer
frumer primitivkayt, neene tsu zayn fun der revolutsyonerer
oytonomishkayt vos shtekt in di oysyes merubes. der hoypt-held fun
maysele iz a yishuv|nik velkher hot in a groyser eys-tsore oyf yidn keyn
tfiles un slikhes nisht gekent zogn, vayl mer vi dem alef-beys hot er
zikh in der goyisher dorf-svive nisht gehat oysgelernt. dos hot im ober
nisht geshtert optsushrayen di bitere gzeyres un tsu rateven
klal-yisroel; er hot mit groys kavone un k|seyder gezogt nor dem
alef-beys; in himl hot men shoyn di bazundere oysyes fun dem yishuv|nik
metsaref geven in a gantser tfile.... an andern genyaln amorets, velkher
hot gelebt in berberye, in der shabtse-tsvi tkufe, hot men fun oybn
megale geven vi azoy tsu leynen dem bloyzn alef-beys, vos er hot gekent,
in a gants nayem seyder, az es zoln durkh dem oyfgedekt vern gvaldike
soydes vegn der geule.(1) [endnotes will be found in _The Mendele
Review_, vol. 2, no. 022] es merkt zikh do a kuryozer barir-shetekh
tsvishn der frukht-trogndiker ameratses fun di proste mentshn un der
sharfer lomdes fun di baley-sod, velkhe flegn oykh mevatl zayn dem
traditsyoneln tekst, tsulib mistishe kavones, un operirn, k|retsoynom,
mit di eyntslne, tseshotene oysyes. oyf der gas fun alef-beys hobn zikh
bagegnt, un di hent gegebn, der proster folklor un di meyukhes|dike
kabole.

in di folks-gleybungen treft men oft dominirn di stam-oysyes,
umfarshtendlekhe rosheteyves un gimatriyes oyf matbeyes, shtiklekh
parmet tsi afile bletlekh poshet papir. baley-sheymes flegn gebn di
dozike kameyes tsu trogn oyfn haldz oder oyftsuhengen ibern bet fun a
kimpetorn, vi a shmire kegn ayn-hore, rukhes un sheydem, oder gor vi a
mitl tsu bakumen bashtimte zgules. der iker zenen bakant di _heyelekh_
far kinder, tsu trogn oyfn haldz. dos zenen geven matbeyes oyf velkhe es
flegt kumen oysgegosn di hey -- an os vos men hot im in der
folksgleybungen tsugeshribn aza mistishe virkung, mestame in skhus fun
dem 'shem' fun velkhn es iz a komponent.

di mistishe zgules vos men iz meyakhes tsu di oysyes in di
folks-gleybungen -- gor bazunders tsu yene vos zenen bashtand-teyln fun
di farshidene sheymes, gots, in der mesore -- vortslen in der alter
alef-beys mistik fun di mekubolem. der _zoyer_ farnemt zikh oft mit der
doziker kategorye gleybekhtsn. er farzikhert, lemoshl, az der rayznder
vos iz mesugl zikh ayntsukukn in himl, erev-nisiye un in der rekhter
sho, vet derzen vi in di heykhn shtartsn aroys likhtikerheyt oysyes vos
zenen zikh metsuref in a vuntsh az zayn nisiye zol zayn mit
hatslokhe.... di dozike ayngleybenish, velkhe iz afile farbundn mit der
gleybekhts az men tor nisht kukn oyf di koyanem b|shas zey dukhenen,
saydn men iz a koyen, hilt ayn der bal-ha|zoyer, vi zayn shteyger, in a
poetish-magishn stil:

"vi nor es kumt der morgn, farshvint dos likht vos hot geveltikt bay
nakht, un lozt iber ort farn likht fun tog. es hersht damolt der morgn
un di memshole fun nakht fargeyt. es iz der morgn fun or-likht, es iz
der morgn vos dergentst dos guts fun ale veltn. fun im shpayzn zikh
eybershte un untershte. er trinkt-on dem gortn. er iz der shoymer fun
der gantser velt. un do iz a sod far di farshtandike; ver es darf zikh
lozn in veg arayn, zol er oyfshteyn fartog un zikh gut aynkukn, loyt der
sho, in mizrekh-zayt, vet er derzen di tmune fun oysyes vos zeyer likht
shlogt fun himl, un vos zey shtaygn un nidern nokh anandik. dos zenen di
likhtike oysyes mit velkhe es iz bashafn gevorn himl un erd. oyb er
farshteyt dem sod fun di dozike oysyes, vos trogn dem sod fun heylikn
nomen tsunoyfgeshtelt fun tsvey-un-fertsik oysyes, un er vet zey
dermonen vi es darf tsu zayn, mit viln in hartsn, vet er derzen in dem
likht vos shaynt in himl zeks yudn -- dray rekhts un dray links -- un
dray vovn, vos shtaygn un nidern un shaynen in himl. un dos zenen di
oysyes fun birkes-koyanem (gemeynt di rosheteyves fun
birkes-koyanem, vos zenen zeks yudn un dray vovn) -- un dan zol er
betn zayn gebet un zikh lozn in veg arayn, vorum di shkhine geyt dan far
im. voyl iz tsu im."(2)

oyf an andern ort farzikhert der _seyfer h|zoyer_, b|derekh klal, az ver
es iz zoykhe bay der toyre, vet yeder os irs, bazunder, im vern a malekh
aroystsuhelfn in a shas-tsore.(3)

fun dem reshus-hayokhed hot di mesoyre aribergetrogn di magishe peule
fun di oysyes in tkhum fun natsyonaler martirershaft. in tsaytn fun
redifes kegn yidishn das iz farshpreyt gevorn a klang tsvishn di mentshn
fun folk az b|shas dem groysn nisoyen darfn zey farshteln zikh far di
oygn dem forkhtikn _shem_. demlt veln zey derzen vi di oysyes zayne
shtartsn un flakern in kholel fun der velt, un vern alts greser un
greser. dos vet zey koyekh gebn baytsushteyn dem nisoyen fun
kidesh-hashem nisht filndik afile di inuyem, un der toyt vet zey in
gantsn nit shrekn....(4) di dozike zgule tsu stoishn bitl-khush, geboyt
oyf der magisher kraft fun alef-beys, zet oys vi tsugemostn far di
karbones fun di inkvizitsye-shaytern.

der kontakt tsvishn lomdes un folklor shtamt fun der derekh-erets
batsiung fun di folks-yidn tsu loshn-koydesh, velkhe vert natirlekh
aribergetrogn oyf di oysyes, nekudes, taymem un tagn zayne. deriber
zenen ot-di oytonome grafishe tseykhns, vos hobn zikh koyne-shem geven
in der yidisher kultur-geshikhte vi kabolistishe ilustratsyes far di
dinste lomdishe rayoynes, oykh arayn vi elementn in di grobere
folks-gleybungen. baym aroysendikn a seyfer fun tilem, betn frume yidn
oyf zikh guts, nisht bloyz in skhus fun zayne maymorem, psukem tsi
verter, nor oykh in skhus fun zayne _oysyes_ ("uveskhus oysyoysov"). un,
kemat in di remen fun a fetishistishn kult, glaykhshtelndik mamesh dem
alef-beys mit got, treft men in seyfer _raziel_ a tfile tsu di oysyes.
es iz a min kishef-shprukh tsu zogn beys men bagert a bashtimte
antplekung in kholem.(5)

2.  kheyder-shpiln, sikhes-khulin un folkslider

in der toyre-svive fun kheyder, yeshive tsi besmedresh, beys dem
vokhadik-soykhrishn mekekh-umemker, bay di shmuesn un gezangen in shtub
un oyf der gas, iz shtark niker geven di hashpoe fun alef-beys.  in
kheyder flegn di yinglekh shpiln di _pey-samekh_-shpil iber a bashtimter
tsol sedres.  eyn tsad hot zikh genumen di groyse _feyen_ un der
tsveyter -- di groyse _samekhn_ vos tseteyln dem tekst fun di sedres.
gevunen hot yener tsad velkher hot ongezamlt a gresere tsol fun geherikn
os; tsi gor di _mem-shin-hey_ shpil, vos bashteyt in a farmest ver es
vet opzukhn frier di oysyes fun vort _Moyshe_ in di bleter fun khumesh.

di beys-medresh|nikes un yeshive-batlonem flegn in zeyer svive oykh
operirn shpasik mit di oysyes:  in dem posek _katsti bekhayay_
(_breyshis_ kof"zayen, mem"vov) lefi velkhn di muter Rifke klogt zikh az
s'iz ir nimes dos lebn, iz di onheyb-kuf, al-pi mesore, klener vi di
iberike oysyes fun tekst. deroyf, vi oyf ale iberike gresere tsi klenere
oysyes fun tanakh (oysyes rabosi uzeiro) brengen di meforshem kolerley
eksegetishe taymem. ober di yeshive-bokhrem brengen daroyf zeyern a
shpasikn teyrets:  di kuf iz klener, elehey a remez az ven a yidene
klogt zikh iz es a blof....

a tsveyter kharakteristisher diolog, vi eyn yid pruvt zikh klign
iber a tsveytn:

- vos toyg mir di fey in homen?
- staytsh, vu gefint zikh den di fey in vort homen?
- farvos gefint zi zikh nisht?
- staytsh, vos toyg den dortn di fey?
- dos freg ikh dokh take!....

di veyniker lomdishe folksmentshn flegn oyf dem alef-beys boyen gegramte
shures in velkhe es zenen geblibn oyfgehit zeyere umshuldik-provintsyele
rayoynes, un zey hobn shoyn far eynvegs gedint vi a mnemotekhnish mitl,
far dertsierishe tsvekn, tsu helfn farhaltn in zikorn di nemen un dem
seyder fun di oysyes:

alef - an odler tut untern himl flien,
beys - a barnboym tut ale zumer blien,
giml - a galekh tut zikh tsu der avoyde-zore knien.

daled - a dokter tut gebn oyf shvitsn,
hey - a himl tut ale zumer dunern un blitsn,
vov - a vayner tut oyf di feslekh vayn zitsn,
zayen - a zelner tut in der milkhome shisn,
khes - a khazn tut zikh baym davnen mit trern bagisn,
tes - a taykh tut loyfn un flisn.

yod  - a yatke-klots, tut men oyf im fleysh hakn,
kof - a kale tut men far ir lekekh bakn
lamed - a leber tut men brokn un hakn.

mem - a meydl tut zikh putsn un tsirn,
nun - a noz tut ale vinter opfrirn,
samekh - a sod, tut men in im geyn shpatsirn.

ayen - an ekdish tut in di fis baysn,
pey - a poyer vos der porets tut im shmaysn,
tsadik - a tson tut der dokter aroysraysn.

kuf - a kokhlefl tut dem top oysmishn,
reysh - a rov tut ale dinem visn,
shin  - a sheygets tut fun keyn alef nisht visn.
tof - a tate in himl hobn mir, a foter,
ven veln mir shoyn vern fun goles poter? (6)

oykh tsvishn di soldatn- un rekrutn-lider vos shpiglen op, in yidishn
folklor, der ikersht, nikolayes fintstere kantonistn-tsayt, mit ire
inkvisitsye-pkhodem un shmad-tsvang, bazunders far minderyerike yidishe
kinder, zenen faran strofes fun payn un vey, ongeshparte oyfn alef-beys:

lomir avekleygn ale zakhn,
lomir zikh nemen tsu der alef:
az men firt a yidele tsu dem asentirung
ligt oyf im der khalef.

lomir avekleygn di alef,
lomir zikh nemen tsu der beys:
az men firt a yidele tsu der asentirung
vert im kalt un heys.

lomir avekleygn di beys,
lomir zikh nemen tsu der giml:
az men firt a yidele tsu der asentirung
vert a rash in himl.

lomir avekleygn di giml,
lomir zikh nemen tsu der daled:
az men firt a yidele tsu der asentirung
vert a groys gevald.

lomir avekleygn di daled
lomir zikh nemen tsu der hey:
az men firt a yidele tsu der asentirung
vert im vind un vey.

lomir avekleyygn di hey
lomir zikh nemen tsu der vov:
az men firt a yidele tsu der asentirung
kumt oyf im gots shtrof.

lomir avekleygn di vov,
lomir zikh nemen tsu der zayen:
az men firt a yidele tsu der asentirung
vert er a yire-shomayim.

lomir avekleygn di zayen,
lomir zikh nemen tsu der khes:
az men firt a yidele tsu der asentirung
vert er toyt vi a mes.

lomir avekleygn di tes
lomir zikh nemen tsu der yid:
az men firt a yidele tsu der asentirung
vert er shvakh un mid. (7)

3. eyfamizmen, psevdo-lomdishe oysdrukn un rosheteyves

fun vegn der kroyve|shaft tsvishn dem alef-beys un loshn-koydesh, zenen
di oysyes, un afile di nekudes, bazunders mesugl tsu dinen vi a yesod
far eyfemizmen. oyf tsu mildern di harbe oysdrukn in a sho fun
dertsernung, oder oyf tsu makhn dem onshtel az men iz in kas -- nutst
men bloyz dos onheyb-oys fun dem grobn idyom, oder men tseleygt gor di
umbakovedike verter oyf zeyere bazundere oysyes.

--gut iz fun a khes a hey: gut iz fun a khazer a hor.

--shtark vi a khes: shtark vi a khazer.

--er iz a kof-lamed-beys: er iz a kelev.

--der shin-daled zol im nemen: der shed zol im nemen.

--mayse shin-tes: mayse sotn.

--er iz a samekh-mem: er iz a sotn (samael).

--es zoln oyf im kumen di fir pasekhn (fun dem klole-vort
'uvakadakhas'_) -- a farshtelte klole, loyt _dvorem_ kof"khes, kof"beys.

di netiye tsu boyen eyfamizmen oyfn yesod fun alef-beys iz niker shoyn
in di talmudishe tsaytn, vi es iz tsu dringen fun a tekst, in velkhn dos
grobe vort _shes_ ('hintn') [homophone of the name Seth, son of Adam
--ed.] iz tseleygt oyf zayne bazundere oysyes.(8) in der moderner tsayt
iz oykh bakant a vertl az "vos men shemt zikh tsu zogn in yidish, zogt
men in loshn-koydesh."

afile der tsolvert fun di oysyes dint tsu boyen eyfemizmen:

--er iz a tsvey-un-fuftsiker: er iz a kelev (kof=20, lamed=30, beys=2).

der tsolvert iz biklal arayn in halb-lomdishe oysdrukn vos geyn arum
tsvishn folk:

--dales al dales(9): fir (eyln) oyf fir (eyln); a groys engshaft.

--er hot deroyf tarp"t taymem: tarp"t batreft 689. do vert es ober
gebrakht vi an umbashtimte, guzme|dike tsol.

--khotsh gib im di tarp"t alofem: ironish, vegn a khosn vos bet a
tsu groysn nadn, lemoshl.

--di reysh alofem: di tsveyhundert toyznt; dos groyse gevins [the
latter = title of a Sholem-Aleykhem play -- ed.].

--a beyser: a matbeye fun tsvey gildn, kopikes, ad"gl.

--lamed-alef shpil: eyn-un-draysik shpil; a kortnshpil.

--er hot shoyn di pey: er iz a ben-shmoynem.

di psevdo-lomdishe folks-khokhme in shaykhes mit der banutsung fun
alef-beys drikt zikh oys mit bazunderer kreftikayt in di rosheteyves|n
velkhe zenen megulgl gevorn durkh di talmudishe tsaytn un shpeterdike
rabonishe sforem, biz tsu der geredter yidisher folksshprakh, in velkher
zey vern genutst zeyer oft:  _tanakh_ -- toyre, neviem, ksovem; _shas_
-- shishe sdorem; _teyku_ -- tishbi yitarets kushies veabayes; _khazal_
-- khakhomeynu zikhroynem levrokhe; _akum_ -- oyvdey koykhovem umazoles;
_yaknehoz_ -- yayin, kidesh, ner havdole, zman -- ad"gl, shoyn opgeredt
fun di umtsolike rosheteyves vos zenen arayn in shrift.

fun di _rosheteyves|n_, in velkhe men shtelt tsunoyf a nay vort mit di
onheyb-oysyes fun shoyn bakante verter, say der hipekh zeyerer, di
_nutrikn_, loyt velkhe a shoyn bakant vort kon geleynt vern elehey
tsunoyfgetsoygn fun di onheyb-verter fun farshidene andere -- ot-di
beyde kuryoze operatsyes iber di oysyes zenen arayn in yidishn folklor
der iker vi hebreizmen. amol treft men oykh a faryidishtn nutrikn.
_betsedek_, lemoshl, vert b|derekh nutrikn geleynt:  ~b~iz ~ts~u ~d~er
~k~eshene. dos folk batseykhnt mit dem dozikn nutrikn, b|derekh-halotse,
a kargn mentshn velkher iz a tsadik nor biz der keshene.... un _melamed_
-- zogt dos folk -- makht:  ~m~er ~l~ernen ~m~er ~d~ales....

4. glaykhvertlekh geboyt oyf oysyes, nekudes, tagen un taymem

zis-kontsentrirte folks-khokhme gemisht mit bitern muser treft men der
iker in di kurtse anonime glaykhvertlekh velkhe geyen arum oyf der
yidisher gas, un zenen geglikhn -- loyt a glaykhvertl take -- tsu binen,
fun vegn zeyer honik, gift un kleynem guf. di balibte oysyes, zeyere
nemen, der batayt fun di nemen, der batref, di grafishe tsure, un afile
di nekudes, tagn un taymem vos bagleytn zey, hobn gedint vi a yesod far
kolerley idyomen un vertlekh mit sharfzinike ontsuherenishn vegn mides
un maysem-toyvem. ot zenen di vikhtikste, onheybndik fun di oysdrukn in
velkhe di verter _os_ un _alef-beys_ kumen arayn vi komponentn:

--os b|os: pinktlekh; bukhshteblekh; akurat ("ibergebn
os-b|os"). enlekh zayn; gerotn zayn in emetsn ("os-beos der tate").

--nisht nokhgebn an os: nisht mevater zayn afile oyf a kleynikayt.

--loytn os fun gezets: formal, on dem mindstn opneyg.

--a toyter os: an umnutslekhe zakh; an umfarshtendlekher inyen.

--di kleyne oysyes; di shvartse pintelekh: di toyre; di sforem vos
zenen gedrukt mit kleyne oysyes far lomdonem ("er iz boke in di kleyne
oysyes"; "er iz bahavnt in di shvartse pintelekh").

--kidesh-levone oysyes: groyse oysyes ("gedrukt mit _kidesh levone
oysyes_").(10)

--oysyes makhkimes: oysyes makhn klug; geshribn iz zikherer vi
geredt; geshribn iz gringer tsu farshteyn; shvarts oyf vays.

--blaybn on oysyes: nisht visn vos tsu entfern; blaybn on diburem.

--an alef-beys emes: an emes gomer; a zakh vos yeder muz visn, un es
zenen deroyf nisht khal keyn vikukhem. (11)

--an alef-beys b|alma: oysyes stam, on shum inhaltlekher farbindung
(loyt _bove basre_, kuf samekh"khes ayen"beys).

--alef-beys yingl; alef-beys|nik: a yung kind; an onheyber.

                           1.  oysyes

--fun alef biz tof: fun onheyb bizn sof.(12)

--onheybn fun alef: onheybn fun onheyb; onheybn fun dos nay.

--loy mit an alef; loy mit a groysn alef:  neyn; an energisher
opzog.(13)

--lamed alef: loy; nisht; a kategorishe negatsye.

--nisht kenen keyn alef, nisht visn fun a tsures alef: zayn an
amorets.

--nisht kenen keyn tseylem fun keyn alef; nisht kenen a tseylem far an
alef: zayn an analfabet; nisht kenen onshraybn a tseykhn (tseylem)
onshtot an os; nisht derkenen dem khilek tsvishn a tseykhn un an os.

--zikh shteln bay der alef: nisht avekgeyn vayter; nisht progresirn;
nisht zayn aktiv; zikh nisht rirn fun ort.

--ver es zogt alef muz zogn beys: nor der onheyb iz shver; kol
haskholes koshes; zayn oysgehaltn bizn sof.

--fun beys biz lamed: di gantse toyre (vos heybt zikh on: _breyshis_,
un endikt zikh: _yisroel_).

--zol ikh azoy visn fun beyz, giml un dalet: a verter-shpil geboyt oyf
der enlekhkayt fun oysshprakh tsvishn beyz (shlekhts) un beys (der nomen
fun os).

--ver es veyst nisht fun beyz, veyst nisht vos giml batayt: der zelber
verter-shpil mit a nayem element _giml_ vos batayt:  guts. ver es hot
nisht durkhgemakht shlekhte tsaytn, filt nisht dem emesn tam fun gute
tsaytn.

--du bist beyz, bin ikh giml: vider a vort-shpil tsvishn _beyz_ un
_beys_. _giml_ batayt:  gut.

--makhn tomed giml: hobn mazl, gevinen; avekgeyn emetsn gut; zayn in
a gutn matsev ("az voyl iz dem vos makht tomed giml").  (14)

--es vet zayn giml: es vet zayn gut.

--es vet zayn gitl:  vi frier (shpasik, tsulib der enlekhkayt tsvishn
der tsure fun _tes_ un _mem_; oykh tsulib der enlekhkayt tsvishn _gut_
un _gitl_, vos iz a froyen-nomen).

--vayzn dem ferdl a hey in sider: opnarn; yoytse zayn mit hoyle
haftokhes; opkumen yenem mit reyd ("er git im tsu esn dem hey fun
sider"). verter-shpil tsvishn hey (nomen fun os) un hey (vos di beheymes
esn).

--lang vi di vov fun Vayzose: zayn lenger vi geveyntlekh (elehey di
vov fun Vayzose in megiles-Ester, vos iz loyt der mesoyre lenger vi di
iberike oysyes).  (15)

--araynleygn in der khes; araynleygn in khes reysh; araynleygn in di
dray oysyes arayn: araynleygn emetsn in kheyrem.

--kholile mit tsvey khesn: kholile vekholile; khas vekholile.

--a bokher on a khes: a grober yung (bur).  ("a bokher on a khes zet
oys vi a pyes." hayne, a grober yung iz geglikhn tsu a hunt). [cf.
Polish _pies_ 'dog' -- ed.]

--geld mit a tes: kelt (ironish).

--kutse shelyud:  der tag ibern os yud; dos eybershte shpitsikl fun der
yud; a kleynikayt; a tofl; a bayzakh ("zikh ampern iber a kutse
shelyud"; "nisht optretn kekutse shelyud").

--avekshteln dos pintl unter der yud:  batonen; zogn klor; redn mutik.
(16)

--yud: der kleyner finger fun der hant. (17)

--kleyn vi dos yudele fun Vayzose: a farglaykh tsu kleynkayt.

--er klapt mitn lamed un vil a maymed: er barimt zikh mit falsher
lomdes (tsi er zogt ligns) un vil durkh dem dergreykhn a maymed.  (18)

a lav mit a kleyn lamedl: a kleyn aveyrele.

--skhoyre mit a mem: umtoyglekhe skhoyre (hayne, mit a mum).

--beser a farkerte nun eyder a farkerter tsadik:  vort-shpil. a teyrets
oyf der eksistents fun tsvey farkerte nunen in tanakh-tekst (_bamidber_
yud' lamed"hey-lamed"vov) vos iz shoyn far eynvegs a moshl kegn tsviyes
("farkerter tsadik"...).

--bay im iz der pey far dem ayen: er redt eyder er zet. (19)

--tsvey feyen:  farfaln; a farfalener khoyv ("shrayb deroyf tsvey
feyen"; "shtel deroyf tsvey feyen").

--men badarf zikh hitn far finf feyen:  hayne, fonye, feldsher, furman,
fleysher un fisher.

--verter fun di dray feyen: hayne, fisher, fleysher un furman; verter
un oysdrukn mit velkhe es banutsn zikh di mentshn vos gehern tsu ot-di
dray profesyonele kategoryes, un, biklal, di sotsyal veyniker khosheve
shikhtn fun folk. (20)

--a tsig oder a fertsiker, abi beyde zenen mit a tsadik: ironish,
vegn kloymershter erlekhkayt.

fun a tsadik kon men alts aropnemen, ober der yud blaybt:  a frumer man
blaybt orem ober er zindikt nisht. an oysyes-shpil geboyt deroyf, az oyb
fun den nomen fun os _tsadik_ zol men aveknemen di _ts_, di _d_ un di
_k_ -- blaybt nokh alts di _y_ [yud].

--a tsadik in pelts:  a falsher mentsh; a hipokrit; der vos makht dem
onshtel fun a frumen; der vos zorgt nor far zikh.  (21)

--eynem opgebn di reysh: opgebn koved (onrufndik yenem r' [reb]).

--avekshteln dos pintl iber der shin: zogn klor, mutik; batonen. (22)

a toyve mit a tof: a shpitsl; a miese zakh (vort-shpil tsvishn
_toyve_ un _toeyve_).

                         2.  nekudes un tagn

--pasekh shin (sha):  shvaygn; haltn sod; haltn dos moyl. mit di dozike
verter, un nokh tsuleygndik, al-pi-rov, dem finger tsu di lipn, heyst
men yenem shvaygn ("der orl iz oymed ba|pesakh, pasekh-shin" ['Quiet,
the gentile is in the doorway!']).

--az dos mazl geyt nisht, makht komets beys -- ba; az dos shlimazl vil,
makht komets alef -- be; az got vil, makht komets beys -- ba; az s'geyt
nisht, makht komets beys -- me: a basherte zakh; a fatalitet.

--tseyre giml (gey): azoy iz men yenem meshaleyekh (katoves).

--khoylem nun, nu: azoy traybt men unter a foyln (katoves).

--a yid iz vi a segl: in velkher zayt men dreyt im, blaybt er alts a
yid (elehey der segl vos hit oyf zayn figur in ale meglekhe pozitsyes).

--a melupem-kind: ver es halt baym onheyb; a mentsh on derfarung.

--mit ale tagn: mit ale baputsungen; in gantsn aroysgeendikt; gemakht di
arbet b|shleymes (elehey der soyfer vos endikt shraybn a seyfer-toyre
gentslekh, ersht ven er baputst di oysyes mit di tagn).

                            3.  taymem

--makh an esnakhto!: hayne, an opshtel, shvayg! her oyf reydn.

--tsien pozer: tsien farn oyer.

--oysdreyen a pozer: gebn a shtarkn patsh.

--loy mit pozer: ze "loy mit an alef".

--kadmo veazlo fis: krume fis.

--oysdreyen a shalsheles: ze "oysdreyen a pozer".  (biklal kumt arayn
der oysgekrimter bavegung:  "a kvitsh mit a tsen-gorndikn shalsheles" --
mendele; "a khsime mit a shalsheles"; "oysgekrumt vi a shalsheles"
(ad"gl).

         4.  der alef-beys folklor in pedagogishn tkhum

loyt an altn mineg flegt dos yidishe kind onheybn lernen alef-beys in
der elter fun dray yor, (23) un fun vegn der khshives vos men iz
meyakhes geven der doziker gesheenish, hot zi b|derekh-klal zikh
opgeshpilt in di remen fun a farbikn tseremonyal. kefi es bashraybn dem
mineg rashi"s talmid, reb Simkhe vitri (_makhzer vitri_ sy' tk"kh)) un
der bal-harokeyekh (_halokhes atseres_ d' m"g, omed khes') bakt men op
dray honik-khales oyf velkhe es zenen oyfgeshribn tsugeklibene psokem;
me kokht op dray eyer, un me greyt tsu epl un kolerley peyres. dernokh
zukht men oys a _khokhem vekhoshev_ velkher firt dos oysgevashene un
yontef|dik ongetuene yingele, unter a tsudek, in shil arayn, vu me git
im tsu esn di gute zakhn un me leynt far im for tsum ershtn mol dem
alef-beys, fun a tovl. lesof shmirt men on a bisl honik oyf di oysyes
fun tovl, un me heyst dem kind lekn di zise oysyes...(24)

der mitl-elterlekher mineg tsu makhn kishef|dik dem alef-beys farn kind,
fun di ershte yorn on, iz oyfgehit gevorn in farshidene versyes
b|meshekh di shpeterdike doyres, un hot goyrem geven dem oyfkum fun
kolerley folksshafungen, velkhe shteyen in same pedagogishn tkhum, vi di
farshpreyte kinder-mayse vegn malekh pimper velkher varft rozhinkes oyfn
alef-beys. in di nayere tsaytn iz bakant, in der prat, di melamd|ishe
shite fun onheybn lernen mitn kind durkh ayn|khazer|n mit im di _nemen_
fun di oysyes, un glaykhtsaytik di figurn zeyere. kedey tsu farfiksirn
di nemen un di tsures in zikorn fun di yunge talmidem, hobn di melamdem
gemuzt onkumen tsu kolerley hamtsoes un kuntsn, zikh dertrakhtndik
derbay tsu der shite fun farbindn di oysyes mit enlekhe, shoyn bakante
figurn fun der kindersher svive:

--alef iz a koromisl mit tsvey kendelekh, oder emerlekh

--beys iz a shtibele mit an ofn tirele

--giml iz a shikhele (25)

--daled iz a hekele

--hey hot an untergehakt fisele

--vov iz vi a bitshikl (shtekele)

--zayen iz vi a shverdele

--khes iz vi a benkele

--tes hot oybn a tirele

--yud hot a kleyn kepele

--kof hot a kaylekhdik rukndl

--lamed hot a lang heldzele

--mem hot a tirele untn

--nun iz vi a fishele, oder vi a zekele (diminutiv fun 'zok')

--samekh iz vi a shlos

--ayen hot tsvey kepelekh

--pey hot an aropgeboygn kepele

--tsadik hot a horb oyf di pleytses

--kuf hot a lang fisele

--reysh iz vi a kaylekhdik shtekele

--shin hot dray kepelekh

--tof hot a krum fisele

der doziker sistem iz bakant geven shoyn tsu di eltere melamdem, kefi es
zogt eydes in zayne khidushem tsu masekhes _sanhedrin_ (perek yud-alef)
der mekhaber fun _seyfer toyres-khayem_, reb avrem-khayem shor, velkher
iz geshtorbn in yor shats"b; di giml hot a min baytele ongehangen oyfn
rukn -- a remez oyf gmiles-khsodem; di daled hot a kurts fisele; di alef
iz a man mit eyn krug in hant un mit a tsveytn oyfn rukn, elehey er volt
on oyfher geshept toyre fun a tifn brunem; di beys hot a breyt tseefnt
moyl tsu zogn toyre, ad"gl.  (26)

az di melamdey-tinoykes zenen zikh noyeg geven tsu gebn simonem di
kinder baym lernen zey alef-beys, zogt eydes an anderer mekhaber, reb
binyomin-volf b"r matisyohu, in zayn seyfer _tares hakoydesh_ (kheylek
b' perek t'), opgedrukt tsum ershtn mol in amsterdam, tats"g.(27) nokh
an anderer, kloymersht mer modernistisher mekhaber, Yude-leyb ben zev,
in zayn lernbikhl _beys haseyfer_ opgedrukt in vin, 1816, lakht op fun
dem melamd|ishn simonem-metod:  "men brengt farn yingl -- zogt er in der
hakdome -- an alef-beys tovl, un men lernt im di tsures fun di oysyes
durkh di farshidnste simonem, lemoshl:  a krug oybn, a krug untn un a
koromisl in mitn, iz an alef; an oyfgeefnt moyl iz a beys....un nokh
azelkhe narishkaytn."  (28)

nisht gekukt ober oyf reb Yude-leybs kritisher bamerkung, iz der system
fun di gedenk-simonem geblibn ongenumen bay di melamdem, velkhe flegn im
fil mol endern un baraykhern, mit der kavone tsu makhn di oysyes vos
heymisher, durkh farglaykhn zey oft mol tsu figurn fun der eygener svive
un fun dem eygenem shtetl. ot iz a bashraybung vi azoy di melamdem fun
poylishn shtetl mlave hobn tsugemostn dem system fun gedenk-simonem tsu
zeyer eygener svive:

"kinder kleyntshike heybn on zeyer veg in yidishkayt fun Borekh
melamed|s kheyder. etlekhe geyen nokh a zman-tsvey tsu Peysekhn. beyde
khadorim gefinen zikh antkegniber der shil. groyse tovlne alef-beysn
lign oyf tishn. der dorfisher melamed "Borekh sobyesrol" fort mit a
fishbeynernem "taytl" iber di tovlen. bay yedn os dershaynt a nay
geshtalt:  "alef" -- trogt a mentsh a mase oyf di pleytses, geyt er
ayngeboygn, "giml" -- a baytl mit gelt -- lernt, lernt kinderlekh, veln
baytlekh fule gelt faln aykh fun himl -- zogt der rebe. eygelekh
glantsn. far a groshn krigt men in gevelbl bay Khaye-Soren a mandl,
eyer-beygelekh, bay der alter bobsertshine mitn horn oyf der noz -- a
hiltsern mestele fun gekokhte arbes.  "daled" -- iz der degn (degl) fun
simkhes-toyre. arum der "hey" tantst der lomer Simkhe, Yankev-Moyshe
mitn kurtsn fus.  "khes" -- iz der arayngang in kheyder. dos "yudele" iz
azoy kleyn, aza pitsele, az es krikht aleyn in hartsn. lange "kofn"
"feyen", zenen yankl tseytogs hoykhe gasn-lamtern.  "lamed" iz dos
hoykerl, Moyshe-soyfers vayb.  "samekh" -- a fesl bir, vos shteyt baym
kleynem "foterl" in fentster.  "ayen" -- a noz mit oygn. laykht iz di
"shin", dorozhkarske ferd trogn lederne briln, trogn "shinen" zilberne,
fun beyde zaytn oygn."  (29)

oykh byalik, in zayn oytobiografisher dertseylung "safiakh," bashraybt
an enlekhn epizod fun di kinderyorn. in poets shtetl iz di alef geven a
koromisl mit tsvey emerlekh, di giml a shtivl, di lamed a bushl, ad"gl.
akhuts di traditsyonele-ongenumene farglaykhn vos zenen mit kleyne,
heymishe shinuyem genutst gevorn mitsad di melamdem fun ale shtetlekh,
flegn nokh di oysyes onnemen kolerley geshtaltn, lefi der fantazye fun
yedn kheyder-yingl bazunder:

"nokh dem ershtn tog -- shraybt byalik -- beys der belfer hot mir gevizn
dem alef-beys-tovl mit zayne shures, zenen mir teykef antkegngeshprungen
gantse polkn mit soldatn, fun yene vos geyen a mol durkh far undzer
shtub, mit dem poyker b|rosh:  tam-tara-dam! der iker zenen tsu zey
enlekh geven di shures _alefn_ un _gimlen_ mit der nekude _kubuts_ unter
zey. zey zenen dokh mamesh soldatn, bavafnt fun kop biz di fis. di alefn
trogn zeyere torbes oyf di pleytses, un shpanen a bisl ayngeboygn unter
zeyer mase, glaykh zey geyen oyf manevres; un di gimlen shteyen mit
oysgeshtrekte fis oyf faroys, greyt tsum marsh...."(30)

un fun der doyres|diker fantazye fun di kheyder-yinglekh iz der
alef-beys, haynttsaytik aribergeshprungen in der politisher vor fun
yidishn folk. Khayem liberman dertseylt es in rayze-ayndrukn fun medines
yisroel, in shaykhes mit a bazukh zaynem in tel-oviv|er armey-kvartal,
vu di yidishe oysyes dinen vi militerishe kentseykhns:

"un bald derfilstu, az do, in dem kvartal armey, hot der yidisher
alef-beys gevunen a gants nayem zin, vos der rebe in kheyder hot lang
gehat fargesn, un efsher gor keyn mol nisht gevust; s'iz epes gor an
ander alef-beys:

"s'iz an alef vos shist! a beys, vos az er git a brum, faln ayn di domem
bay zibn felker, un der giml shteyt un hit heylike grenetsn, un der kuf
shlept a kanon, un der tsadik trogt a biks oyfn aksl....

"du kukst oyf di yidishe oysyes in der doziker merkvirdiker umgebung un
trakhst:  vi modne es zenen di vegn fun der geshikhte! ot ersht der
daytshisher soyne vos hot zikh farmostn optsumekn dem yidishn alef-beys
fun dem ponem fun der erd in eynem mitn folk. der daytshisher soyne iz
nokh nisht geven rekht ayngeleygt, iz gekumen der rusisher soyne in
geshtalt fun stalinen un hot opgemekt dem yidishn alef-beys fun der leng
un breyt fun rusland, dem yidishn os in eynem mit zayn shrayber.

"un do, do iz oyfgeshtanen a yidishe medine, un di medine hot
oyfgeshtelt an armey, vos hot aroyfgeshtelt dem yidishn os oyf ir fon
un iz greyt far im blut tsu fargisn. der yidisher os iz ir gevorn a
symbol fun kraft un kamf....

"mitn yidishn os oyf zayn kakarde, oyf zayne epoletn, oyf zayn brust,
shteyt der yidisher zelner oyf der vakh fun yidishn kiem. fun di yidishe
oysyes shept er koyekh un vizye...._ (31)

6. di mayse iz oys

ot haltn mir baym soyf fun der shneler ekskursye vos ir tsvek iz geven
oyftsuzukhn dem alef-beys in di farvorfnste gebitn fun yidishn folklor.
di arbet iz nisht ongekumen tsu shver:  historish un inhaltlekh farnemt
loshn-koydesh a khoshev ort in der anonimer yidisher vort-shafung;
mimeyle treft men di eyntslne oysyes fun dem dozikn loshn arayngevebt vi
feste elementn in di gleybungen, zgules, aynredenishn un shpasike tsi
tifzinike mayses un vertlekh fun folk.

vi emese shlikhem fun gedank, zenen di oysyes mesugl tsu vern tipishe
motivn in dem yidish-folkloristishn shafn, vos zayn hoypt-eygnshaft iz
di idealizatsye fun gedank un fun gayst. un vi emese kinder fun yidishn
alef-beys, hobn zey baygeshtayert tsu der faryidishung fun a groyser
tsol folkloristishe motivn vos zenen dos b|shutfes|dike hob-un-guts fun
ale umes.
-----------------------------------
End of _The Mendele Review_ 02.023

Leonard Prager, editor  <lprager@research.haifa.ac.il>

Subscribers to _Mendele_ (see below) automatically receive _The Mendele
Review_.

Send "to subscribe" or change-of-status messages to:
    listproc@lists.yale.edu

        a. For a temporary stop: set mendele mail postpone
        b. To resume delivery: set mendele mail ack
        c. To subscribe: sub mendele first_name last_name
        d. To unsubscribe kholile: unsub mendele

              ****Getting back issues****

_The Mendele Review_ archives can be reached at:

http://www2.trincoll.edu/~mendele/tmrarc.htm